Fasteignasali segir mikinn áhuga á jörðinni Hellisfirði í samnefndum firði sem auglýst var til sölu í byrjun vikunnar. Hinir áhugasömu telja það jafnvel kost að ekki sé akvegur í fjörðinn.
Flúor mældist yfir viðmiðunarmörkum í sýnum sem tekin voru í Reyðarfirði í júní. Hættara er við að flúorgildin aukist þegar sumrin eru þurr og hlý líkt og verið hefur. Áfram verður fylgst með flúorlosun frá álverinu í Reyðarfirði.
Vonast er til að fæðingarþjónusta á umdæmissjúkrahúsi Austurlands í Neskaupstað skerðist lítið þrátt fyrir að bann við yfirvinnu ljósmæðra gangi í gildi á miðnætti.
Talið er að um tvö tonn af lýsi hafi farið í höfnina á Fáskrúðsfirði í mengunaróhappi fyrir tæpum tveimur vikum. Umhverfisstofnun fór fram á að fjaran yrði vöktuð en best sé að láta náttúruna brjóta niður efnið.
„Júní er fjölmennasti mánuður sem við höfum fengið á tjaldstæðunum síðan talningar hófust árið 2001 og júlí lofar mjög góðu,“ segir Bergrún Arna Þorsteinsdóttir, aðstoðarskógarvörður og umsjónarmaður tjaldstæðanna í Hallormsstað.
Búið er að fella tólf hreindýrstarfa á veiðitímabilinu sem hófst á sunnudag. Veiðikvótinn er stærri en nokkru sinni fyrr en hlutfall tarfa í veiðunum hefur dregist saman. Ekki má byrja að veiða kýr fyrr en 1. ágúst.
Virkja þurfti tryggingar hjá Ferðamálastofu til að koma farþegum á vegum Ferðaskrifstofu Austurlands (FA Travel) heim frá Alicante í lok apríl eftir að skrifstofan fór í rekstrarstöðvun. Ekki hefur þurft að grípa til slíkra aðgerða í tæp tuttugu ár.
„Ég er alveg líkamlega búin að jafna mig en sálin er enn voðlega ónýt eftir þessa reynslu,“ segir Margrét Sigurðardóttir, sem var hætt komin eftir að hafa verið byrlað ólyfjan á tónlistarhátíðinni Eistnaflugi um helgina.
Haldið var upp á þann áfanga í Neskaupstað í gær að sextíu ár eru liðin frá því að tekið var á móti fyrsta síldarfarminum í verksmiðju Síldarvinnslunnar. Um leið var minnst þeirra sem látist hafa við störf hjá fyrirtækinu.
Valdimar O. Hermannsson, fyrrum formaður Sambands sveitarfélaga á Austurlandi, hefur verið ráðinn nýr sveitarstjóri Blönduósbæjar. Gengið var frá ráðningunni fyrir helgi.
Til stendur að veita bæjarfulltrúum á Fljótsdalshéraði aðgang að gögnum er varða áætlanir um nýja fráveitu í þéttbýlinu á Egilsstöðum og Fellum. Meirihlutinn í bæjarstjórn telur rétt að stíga varlega til jarðar þar sem um gögn einkahlutafélags sé um að ræða. Tillögu minnihlutans um að vanhæfi bæjarfulltrúa til meðferðar málsins yrði kannað var vísað frá á fundi bæjarstjórnar í síðustu viku.