Vaxtarsamningur Austurlands hefur stutt við um 60 verkefni til atvinnusköpunar á Austurlandi. Verkefnin eru misstór og ná yfir alla geira, þar á meðal iðnað, framleiðslu, ferðaþjónustu, sjávarútveg, menningu, matvæli og landbúnað. Samningurinn er innan vébanda Þróunarfélags Austurlands.
Hundrað og tuttugu börn úr æskulýðsfélögum kirkjunnar á Austurlandi fá ekki að fara á Landsmót æskulýðsfélaga kirkjunnar vegna ótta við H1N1-flensuna. Halda á mótið í Vestmannaeyjum um næstu helgi og höfðu 570 börn verið skráð á mótið.
Vel hefur gengið að fá innlenda kröfuhafa til að samþykkja kröfur lífeyrissjóðsins Stapa í bú Straums Burðaráss. Unnið er að því að fá samþykki erlendra kröfuhafa.
Stjórn AFLs Starfsgreinafélags mun fela lögmönnum félagsins að stefna umsjónarmönnum peningamarkaðssjóðs Landsvaka vegna þess tjóns sem félagið varð fyrir við uppgjör sjóðsins.
Tilefni stefnunnar er að félagið telur að sjóðsstjórar Landsvaka hafi blekkt félagið til fjárfestinga þegar ljóst var að áhættudreifing var óásættanleg.
Að vanda er margt forvitnilegt í fréttablaði Austurlands. Má þar nefna viðtal við Tinnu Halldórsdóttur um niðurstöður rannsóknar hennar á hag austfirskra kvenna og afrakstri þeirra á uppgangstímanum kringum virkjunar- og stóriðjuframkvæmdir og viðtal við ungan Austfirðing, Birnu Pétursdóttir, sem er að stíga sín fyrstu skref í virtum leiklistarskóla á Bretlandseyjum. Hákon Viðarsson, starfsmannstjóri Síldarvinnslunnar gefur fínar uppskriftir fyrir helgina og sagt er í máli og myndum frá skemmtilegum göngudegi á Fáskrúðsfirði. Austurglugginn fæst á betri blaðsölustöðum.
Í Austurglugga vikunnar er fjallað nánar um tímamótaákvörðun austfirskra sveitarfélaga um að stefna að heildarsameiningu og kynnt fjögur af um 60 verkefnum Vaxtarsamnings Austurlands; kurlkyndistöð í Hallormsstað, Austfirskar krásir, efling lífrænnar framleiðslu og vetrarferðaþjónusta. Rannveig Þórhallsdóttir ritar minningarorð um Önnu á Hesteyri og Hjörleifur Guttormsson um Eggert Brekkan. Þá er fjallað um nýsköpunarkeppni grunnskóla og um kórsöng sem grætir jafnvel hörðustu nagla. Þetta og margt fleira í Austurglugganum í dag. Áskriftasími Austurgluggans er 477-1571.
Í nýjum Austurglugga má meðal annars lesa um áform Alcoa Fjarðaáls um að reisa kersmiðju sem skapa mun mörg ný störf, 47 ára farsælt starf Lellýar (Þuríðar K. Guðlaugsdóttur) með reiðfirsku ungviði, 30 ára afmæli Menntaskólans á Egilsstöðum í vikunni og 90 ára minningu Alþýðuskólans á Eiðum. Sigmundur Ernir Rúnarsson alþingismaður skrifar um atvinnumál og sagt er frá því þegar Smári Geirsson talaði á tímabili eins og erkiíhald og knúskyssti Framsóknarkonur. Blað allra Austfirðinga fæst á betri blaðsölustöðum.
Fjögur íslensk tog- og nótaskip hafa undanfarna daga tekið þátt í makrílrannsóknum fyrir Austur- og Suðausturlandi sem skipulagðar eru af Hafrannsóknastofnun. Meðal skipanna er Ingunn AK, sem HB Grandi gerir út, og lauk skipið yfirferð sinni í nótt sem leið að sögn Vilhjálms Vilhjálmssonar, deildarstjóra uppsjávarsviðs HB Granda.
Þau miklu tímamót urðu í austfirsku sveitastjórnasamstarfi í dag að aðalfundur Sambands sveitarfélaga á Austurlandi (SSA) samþykkti að vinna að því að Austurland, þ.e. svæðið frá Vopnafjarðarhreppi til Djúpavogshrepps yrði eitt sveitarfélag. Tillagan var samþykkt samhljóða. Þetta er tímamótaverkefni sem á sér ekki hliðstæðu á Íslandi.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.