Í undirbúningi er stofnun hagsmunasamtaka í þágu barna og unglinga með tal- og málhömlun. Í undirbúningshópnum eru 10 manns. ,,Þetta er hópur vaskra foreldra ásamt þremur talmeinafræðingum sem láta sig velferð barna með málþroskaröskun varða og eru tilbúin að leggja á sig mikla vinnu til að hrinda af stað samtökum," segir í tilkynningu.
Í dag tók Hæstiréttur fyrir gagnsóknarmál eigenda Brúar á Jökuldal vegna kröfugerðar íslenska ríkisins um að meirihluti landareignarinnar verði þjóðlenda. Berglind Svavarsdóttir hrl. og Friðbjörn Garðarsson hdl. fluttu málið gegn íslenska ríkinu fyrir hönd umbjóðenda sinna Stefáns Halldórssonar og Sigvarðs Halldórssonar, landeigenda á Brú. Krafist er ógildingar á úrskurði óbyggðanefndar um þjóðlendu á Brúaröræfum. Landeigendur krefjast og viðurkenningar á eignarréttarlegri stöðu Brúar á Jökuldal á svæðinu.
Talsvert hefur verið um ferðafólk í Laugarvalladal á Brúaröræfum í sumar. Þar rennur heit uppspretta fram af klettabelti og njóta ferðamenn þess að baða sig í þægilega heitum fossinum, sem fellur ofan í náttúrulega vatnsskál. Þar má einnig liggja líkt og í heitum potti og njóta fagurrar náttúrunnar umhverfis. 
Kristján L. Möller, ráðherra samgöngu- og sveitarstjórnarmála, hefur kynnt stjórn Sambands íslenskra sveitarfélaga þá hugmynd sína við Sambandið kannaðir verði sameiginlega mögulegir sameiningarkostir í hverjum landshluta sem síðar yrðu lagðar fyrir Alþingi í stað þeirrar hugmyndar að hækka lágmarksíbúafjölda úr 50 í 1.000.
Djúpavogshreppur hyggst eignast þriðjungs eignarhlut í einkahlutafélaginu H2O WATN (Worldwide Aqua Transport Network). Meðeigendur eru Auðunn S. Ólafsson og Ólafur S. Ögmundsson. Uppi eru áform um útflutning á vegum fyrirtækisins á vatni með tankskipum sem kæmu til með að liggja við festar í Fossárvík í Berufirði, en vatnið yrði tekið úr Nykurhyl, sem er einungis 1,5 km frá væntanlegum legustað skipanna.
Farið er að renna á yfirfalli Hálslóns. Þegar Austurglugginn var á ferð við lónið um helgina mátti sjá að byrjað var að skvettast ofan í yfirfallið og því skammt að bíða þess að Jökla tapi sínum blágræna lit sem einkennt hefur hana í sumar og verði jökullituð. Vatnsbúskapurinn er með nokkrum öðrum hætti en í fyrra vegna kulda, en í meðalári má búast við að vatn renni úr Hálslóni á yfirfall fljótlega í ágúst.
Fulltrúar stjórnar Þekkingarnets Austurlands, ásamt framkvæmdastjóra, funduðu með bæjarráði Fljótsdalshéraðs fyrir skömmu varðandi stuðning ÞNA við uppbyggingu staðbundins háskólanáms á Egilsstöðum. Niðurstaða fundarins var að þessir aðilar samþykktu að vinna formlega saman að verkefninu.
Djúpavogshreppur og Vopnafjarðahreppur hafa sameiginlega óskað liðsinnis lögfræðideildar Sambands íslenskra sveitarfélaga við að ganga frá erindi til sérstaks saksóknara um opinbera rannsókn á fjárfestingafélaginu Gift ehf. Á fundi sveitarstjórnar Djúpavogshrepps 3. september sl. lýsti hún ánægju með að málið væri komið í þann farveg.
Bæjarstjórn Fljótsdalshéraðs hefur samþykkt að greiða ekki frístundastyrki í haust vegna íþrótta- og tómstundaiðkunar barna og ungmenna eins og verið hefur undanfarin ár. Sparar það sveitarfélaginu allt að þremur milljónum króna á árinu. Áfram verður ókeypis í sund fyrir börn á leik- og grunnskólaaldri en gjaldskrá Íþróttamiðstöðvarinnar á Egilsstöðum hækkar frá og með næstu áramótum.
Markmið Austurfréttar er að byggja upp vef sem tengir saman Austfirðinga, sama hvar þeir eru niðurkomnir og flytja fréttir úr þeirra samfélagi.