Einn af viðburðum alþjóðlegu athafnavikunnar 16.-22. nóvember n.k. er Athafnateygjan. Teygjan, sem hægt er að smeygja um úlnlið sér, er send á valinn hóp áberandi einstaklinga í athafnalífi, stjórnmálum og fjölmiðlum – til fólks sem hefur áhrif á umhverfi sitt og er í aðstöðu til að vera öðrum til fyrirmyndar. Sveitar- og bæjarstjórar á Austurlandi fá Athafnateygjuna senda í pósti fyrir mánudag og vonast aðstandendur athafnavikunnar til að þeir verði duglegir að framkvæma og að teygjan gangi hratt manna á milli á Austurlandi (hægt er að rekja hverja teygju á www.athafnateygjan.is).
Stefán Stefánsson fyrrverandi framkvæmdastjóri Þróunarfélag Austurlands hefur sent frá sér yfirlýsingu vegna frétta af sölu Malarvinnslunnar og aðkomu hans að henni. ,,Vegna umfjöllunar í Svæðisútvarpi Austurlands og fréttatímum RÚV um málefni Þróunarfélags Austurlands vill undirritaður taka fram: Ríkisútvarpið flutti 6. nóvember ítrekað fréttir af sölu Malarvinnslunnar til Kaupfélags Héraðsbúa og aðkomu minni að því máli. Öll var framsetningin á þann máta að glæpur hefði verið framinn og að ég undirritaður hefði framið glæpinn. Slegið var fram, án nokkurs rökstuðnings, að minn þáttur í málinu væri ,,sorglegur" og ,,siðlaus" svo dæmi séu tekin.
Austurglugginn fékk 3.621 heimsókn síðustu viku októbermánaðar, samkvæmt samræmdri vefmælingu Modernus. Það er um 120% aukning frá vikunni þar á undan og það mesta sem vefurinn hefur fengið á árinu þó að í þrjú önnur skipti hafi heimsóknir farið í um 3.200 heimsóknir.
Flughált er nú á Fjarðarheiði og víða hálka eða hálkublettir inn til landsins þótt autt sé með ströndinni. Mikil hálka var á Egilsstöðum í morgun og virtist það koma fólki nokkuð í opna skjöldu, bílar runnu stjórnlaust og börn duttu af hjólum sínum. Vegfarendur eru beðnir um gæta varúðar.
Eftir bankahrunið og með auknu atvinnuleysi hófst umræða á Fljótsdalshéraði um hvort unnt væri að koma á fót miðstöð, verkstæði eða nokkurs konar iðngörðum í því skyni að virkja hugmyndir, skapa atvinnu og stuðla að framleiðslu á austfirsku gæðahandverki og hugviti. Verkefninu hefur nú verið ýtt úr vör af stoðstofnunum á Austurlandi; MenningarráðiAusturlands, Þróunarfélagi Austurlands og Þekkingarneti Austurlands og kallast það Þorpið.
Stofnuð hafa verið Skelræktarsamtök Austurlands. Markmið félagsins er að sameina þá aðila sem fást við skelrækt í fjórðungnum og gera hana að arðbærum atvinnuvegi í framtíðinni og útflutningsvöru. Mikil eftirspurn er eftir kræklingi í Evrópu. Skel er nú ræktuð í Eskifirði, Reyðarfirði, Mjóafirði og Bakkafirði.
,,Þau ánægjulegu tíðindi bárust nú nýlega að Ísland er komið í fyrsta sæti þegar kemur að jafnrétti kynjanna. Þetta er niðurstaða í skýrslu Alþjóðaefnahagsráðsins (World Econonic Forum) sem framkvæmir slíkar mælingar árlega meðal 134 landa, en vinaþjóðir okkar Noregur, Finnland og Svíþjóð verma sætin á eftir okkur,“ skrifar Kristján L. Möller, samgöngu- og sveitarstjórnaráðherra.
Í Austurglugga vikunnar er auk frétta meðal annars fjallað um sýningu Leikfélags Fljótsdalshéraðs á Saumastofunni, Þjóðahátíð Austfirðinga, duglegt handavinnufólk í Hulduhlíð á Eskifirði og frumflutning á nýju austfirsku útvarpsleikriti. Þá er sagt frá lukkulegum fimm ára gömlum Fáskrúðsfirðingi sem vann myndavél í ljósmyndasamkeppni Austurgluggans.
Hafliði Hafliðason hefur verið ráðinn framkvæmdastjóri Þróunarfélags Austurlands tímabundið, í kjölfar uppsagnar Stefáns Stefánssonar framkvæmdastjóra félagsins. Þá hefur verið skipuð þriggja manna framkvæmdastjórn félagsins. Stjórnin mun ekki þiggja starfsframlag fráfarandi framkvæmdastjóra á uppsagnartímanum. Fyrirtæki í eigu Stefáns þáði 26 milljónir króna greiðslu við sölu Malarvinnslunnar til Kaupfélags Héraðsbúa haustið 2007.