Launafl styrkir vatnsverkefni kirkjunnar
Launafl í Fjarðabyggð hefur gefið Hjálparstofnun kirkjunnar fé til kaupa á tveimur vatnsbrunnum. Magnús H. Helgason, framkvæmdastjóri Launafls og Ágúst Sæmundsson, rafvirkjameistari, afhentu kirkjunni á Reyðarfirði ávísun að andvirði 260 þúsund króna rétt fyrir helgi. Þá stendur til að Launafl, Alcoa og Vélsmiðja Hjalta styrki Verkmenntaskólann í Neskaupstað um tólf milljónir króna samtals til tækjakaupa.
Fjarðabyggð styður við Sparisjóð Norðfjarðar
Bæjarráð Fjarðabyggðar hefur samþykkt þá málaleitan Sparisjóðs Norðfjarðar að sveitarfélagið komi að því að auka eigið fé sparisjóðsins. Yfirtekur Fjarðabyggð lífeyrisskuldbindingar sparisjóðsins við Lífeyrissjóð Neskaupstaðar, en bæjarstjóður ber bakábyrgð á þeim. Andvirði þeirra skuldbindinga verður síðar breytt í stofnfé í sparisjóðnum.
Strandaglópur í Hornafirði
Undanfarnar vikur hefur hreindýr haldið sig í Hellinum (eyjunni) sem er við innsiglinguna til Hornafjarðar og er talið líklegt að það hafi synt yfir álinn frá Austurfjörum þar sem nokkur hreindýr hafa verið á beit undanfarið.Starfsmenn Fjarðaáls fá kaupauka á morgun
Á morgun, mánudag, ætlar Alcoa að greiða starfsmönnum Fjarðaáls kaupauka. Hann mun nema mánaðarlaunum, að viðbættu 15% álagi. Áður höfðu Ísal og Norðurál greitt aukalega kaupauka á síðustu vikum. Launaliður samnings AFLs starfsgreinafélags og Rafiðnaðarsambands Íslands við Alcoa Fjarðaál verður næst laus í apríl nk.
Vilja fá Öxi rudda
Djúpavogshreppur og Fljótsdalshérað hafa skorað á Vegagerðina að opna Öxi í ljósi góðs veðurútlits og þess að mun minna fyrirtæki sé að ryðja veginn opinn eftir vegbætur í haust. Vegagerðin segist skilja sjónarmið sveitarfélaganna, en fjallvegurinn tilheyri snjómoksturflokki fjögur og eigi því aðeins að ryðja hann að hausti og vori en ekki á vetrum. Í snjómokstursframlögum til svæðisins í ár sé gert ráð fyrir tvö hundruð þúsund krónum til moksturs en Vegagerðin hafi þegar varið til þess fimm og hálfri milljón. Það sé á valdi samgönguyfirvalda að breyta snjómokstursreglum fyrir Öxi.
Skellir gegn Keflavík og KFÍ
Körfuknattleikslið Hattar tapaði tveimur leikjum í seinustu útleikjaferð sinni um helgina. Liðið lenti fyrst í Íslandsmeisturum Keflavíkur í bikarkeppni karla og síðan í KFÍ á Ísafirði.
Sveinbjörn ekki farinn til Grindavíkur
Ekki hefur verið gengið frá kaupum úrvalsdeildarliðs Grindavíkur í knattspyrnu á Sveinbirni Jónassyni, framherja Fjarðabyggðar eins og fullyrt var í Morgunblaðinu í morgun.
Nemandi í ME hannar merki Þjóðleiks
Í gær var á Egilsstöðum veitt viðurkenning fyrir nýtt merki Þjóðleiks, leiklistarverkefnis á Austurlandi sem unnið er í samstarfi við Þjóðleikhúsið. Nemendur þrettán skóla í fjórðungnum æfa nú frumsamin verk sem sýnd verða á leiklistarhátíð næsta vor á Fljótsdalshéraði. Sú sem hannaði verðlaunamerkið heitir Kristín Inga Vigfúsdóttir og hlýtur hún að launum hundrað þúsund krónur. Einkenni merkisins eru leikgrímurnar tvær, hlátur og grátur og koma útlínur Austurlandsfjórðungs við sögu í hláturgrímunni.
