Eins og undanfarin ár býður Alcoa Fjarðaál konum til kaffisamsætis í álverinu í tilefni kvennadagsins sem er á morgun, 19. júní. Samkoman hefst í mötuneytinu kl. 17. Starfsmenn flytja ávarp og skemmta gestum með tónlist auk þess sem Tryggvi Hallgrímsson kynnir starfsemi Jafnréttisstofu og lög um jafnrétti. Að lokum verður boðið upp á skoðunarferð um álverið. Fjarðaál hvetur konur á Austurlandi til að fjölmenna í kvennakaffið.
Útskriftarnemdar úr búvísindum og hestafræði Landbúnaðarháskóla Íslands á Hvanneyri eyddu tveimur dögum á Austurlandi í útskriftarferð sinni hringinn í kringum landið fyrir skemmstu. Hópurinn heimsótti nokkra austfirska sveitabæi og skoðaði vinnubrögðin þar.
Ester Sif Björnsdóttir hefur hlotið inngöngu á listdansbraut Danslistarskóla JSB eftir erftt inntökupróf sem fór fram í Reykjavík. Þar dansaði Ester fyrir framan dómnefnd og kepptu þar tæplega 50 dansarar um helmingi færri pláss. Að inntökuprófum loknum var 30 efnilegum dönsurum boðið í viðtal og að lokum var aðeins 25 boðið pláss.
Fjöldi Héraðsmanna og gesta lögðu leið sína í Tjarnargarðinn á Egilsstöðum í dag í blíðskaparveðri til að taka þátt í hátíðarhöldum í tilefni þjóðhátíðardagsins. Agl.is mætti með myndavélina á lofti.
Dorrit Moussaieff, forsetafrú, vakti mikla athygli í upphafi framboðsfundar forsetans Ólafs Ragnars Grímssonar á Egilsstöðum í kvöld þegar hún tók sig til og hjálpaði til við að raða stólum í salinn til að sem flestir gætu sest.
Sextán verðmætir fornbílar voru meðal þess sem Norræna kom með að landi á Seyðisfirði í gærmorgun. Bílarnir standa nú á bílastæði Hótel Héraðs þar sem gestir og gangandi geta virt þá fyrri sér. Bílarnir eru flestir í eigu milljónamæringa sem taka þátt í hinu alþjóðlega L’Impérial Rally sem haldið er á Íslandi að þessu sinni.
Sigríður Friðný Halldórsdóttir, grunnskólakennari á Egilsstöðum, fékk viðurkenningu Rótarýfélags Fljótsdalshéraðs fyrir vel unnin störf fyrir samfélagið og kennslu barna. Viðurkenningin var afhent á 17. júní hátíðarhöldum á Egilsstöðum í dag.
Rokkhátíðin Vegareiði verður haldin í sjötta sinn í Bragganum við Sláturhúsið á Egilsstöðum. Tilgangur hátíðarinnar er bæði að gefa austfirskum hljómveitum tækifæri í bland við reyndari bönd. 200.000 naglbítar og VAX eru í hópi reynsluboltanna að þessu sinni.
Íbúar á Seyðisfirði, Fljótsdalshéraði og í Fjarðabyggð með aðstoð félagasamtaka og fyrirtækja tóku til hendinni á samfélagsdegi sem haldinn var á laugardaginn. Víða var hreinsað til og byggðarkjarnar snyrtir. Sólin skein á þátttakendur og hitinn nálgaðist 20 stig. Ljósmyndari Agl.is ferðaðist um á Egilsstöðum og leit við á sérstökum Hattardegi á Vilhjálmsvelli.