Framúrskarandi dansnemi frá Egilsstöðum
Ester Sif Björnsdóttir hefur hlotið inngöngu á listdansbraut Danslistarskóla JSB eftir erftt inntökupróf sem fór fram í Reykjavík. Þar dansaði Ester fyrir framan dómnefnd og kepptu þar tæplega 50 dansarar um helmingi færri pláss. Að inntökuprófum loknum var 30 efnilegum dönsurum boðið í viðtal og að lokum var aðeins 25 boðið pláss.
Ester hefur stundað dans hjá Dansstúdíói Emelíu, sem Emelía Antonsdóttir Crivello starfrækir á Egilsstöðum, frá 10 ára aldri ásamt því að taka þátt í danslistahóp vinnuskólans á Fljótsdalshéraði. Jafnframt hefur hún stundað fimleika með Hetti frá barnsaldri.
Ester var einnig boðið pláss á listdansbraut Klassíska listdansskólans, en hefur valið að sækja nám í Danslistarskóla JSB. Hún mun hefja dansnám sitt í Reykjavík þann 23.ágúst næstkomandi. Ester er fædd árið 1996 og var að ljúka námi við Grunnskólann á Egilsstöðum.
„Ljóst er að hér er um að ræða stór tímamót fyrir dansnemendur frá Fljótsdalshéraði“ segir í tilkynningu frá Dansstúdíói Emelíu.
Nám við listdansbraut Danslistarskóla JSB tekur mið af aðalnámskrá menntamálaráðuneytisins varðandi kennslu og fagleg viðmið fyrir listdanskennslu á grunn- og framhaldsskólastigi. Framtíðarsýn JSB byggir á að skólinn hlúi jafnframt að sérstöðu sinni. Skólinn sérhæfir sig í jazz- og nútímadansi.
Þjálfunin byggir á klassískum grunni en undirstaða alls listdans er talinn vera klassískur ballett. Áhersla er lögð á dansinn sem leikhúsform. Lögð er áhersla á leikræna tjáningu samhliða dansþjálfuninni. Haldnar eru nemendasýningar í nemendaleikhúsi skólans árlega og við önnur hátíðleg tækifæri.
