Todor Hristov nýr þjálfari Hattar/Hugins
Todor Hristov hefur verið ráðinn þjálfari meistaraflokks Hattar/Hugins og yfirþjálfari yngri flokka Hattar. Hann þekkir vel til Austurlands eftir glæstan feril með Einherja.
Todor er fæddur í Búlgaríu og spilaði þar yfir 60 leiki í efstu deild. Hann var bikarmeistari með Beroe árið 2013 og á að baki leiki með bæði því liði og Levski Sofia í forkeppni Evrópudeildarinnar.
Todor kom fyrst til Íslands árið 2014 og samdi þá við Víking. Hann spilaði átta leiki með liðinu í efstu deild það sumar. Sumarið eftir flutti hann sig austur á Vopnafjörð. Hann spilaði þar til ársins 2020 með framúrskarandi árangri, lék 112 leiki og skoraði í þeim 69 mörk.
Hann hætti að spila og fluttist til Vestmannaeyja þar sem honum bauðst að þjálfa yngri flokka. Hann varð síðan aðalþjálfari kvennaliðs ÍBV sumarið 2023 og þjálfaði KFS í fjórðu deild karla sumarið 2024.
Todor tekur við meistaraflokksstarfinu af þeim Björgvini Stefáni Péturssyni og Brynjari Árnasyni sem kusu að hætta í lok sumars. Höttur/Huginn féll úr annarri deild niður í þá þriðju.
