Þyrla Landhelgisgæslunnar kom við á Egilsstöðum í æfingaflugi
Þyrluáhöfn Landhelgisgæslunnar fór í víðtækt æfingaflug í gær þar sem meðal annars var komið við á Egilsstöðum og æft í Kverkfjöllum.
Að sögn Ásgríms L. Ásgrímssonar, framkvæmdastjóra aðgerðasviðs Landhelgisgæslunnar, var siglingafræði aðaltilgangur æfingarinnar sem var óvenju víðtæk þar sem flogið var yfir landið.
„Það er meðal annars til að minna á að Landhelgisgæslan er fyrir alla landsmenn. Það er nokkuð síðan þyrlan hefur verið fyrir austan og yfirleitt er slíkt vegna útkalla,“ segir hann.
TF-GRÓ lenti á Egilsstöðum um kvöldmatarleytið til að taka eldsneyti á þyrluna auk þess sem áhöfnin fór í mat. Á leiðinni austur voru fjallahífingar æfðar í Kverkfjöllum.
Á leiðinni til baka var flug með nætursjónauka æft. Þá var stoppað í Bláfjalli, sunnan við Mývatn og æfðar bæði hífingar og lendingar í fjallendi.
