Enn sankar brugghús KHB að sér alþjóðlegum verðlaunum
Það hefði einhvern tímann þótt saga til næsta bæjar að íslenskur landi fengi fyrstu verðlaun í stórri alþjóðlegri áfengis- og vínhátíð. Það varð raunin með Landa KHB brugghúss á Borgarfirði eystra fyrir stuttu aðeins þremur mánuðum eftir að hafa tekið gullið á World Beer Awards fyrir súrbjórinn Stúlku.
Löngum var það svo að landi var helst bruggaður hérlendis í skúmaskotum og þaðan af miður góðum stöðum og oftast nær með miður góðum árangri. Nú er öldin önnur. Landi KHB fékk gullverðlaunin á Las Vegas Global Spirits Awards fyrir skömmu og önnur landategund brugghússins, Eikarlandi, fékk toppeinkunn að auki þó ekki fengi sá verðlaun.
Vilja koma á útflutningi
Þetta enn ein verðlaunin sem KHB fær á stórum hátíðum erlendis en hugmyndin með þátttöku í slíkum keppnum er að reyna að koma á útflutningi að sögn Helga Sigurðssonar eiganda KHB.
„Við sendum í keppnina bæði Landann okkar og Eikarlandann. Munurinn liggur í að Eikarlandinn fær að hvíla í eikartunnum um eins árs skeið og sá fékk mjög flotta einkunn hjá dómurunum þó að þessi hefðbundni hefði unnið gullið í landaflokknum sem vestanhafs er auðvitað kallað moonshine. Ég fékk þá hugmynd að senda í þessa keppni þar sem ég veitti því athygli að þeir bandarísku ferðamenn sem komu hingað í sumar með skemmtiferðaskipunum voru svo hrifnir af landanum. Svo mér lék forvitni á að vita hvernig myndi ganga í stórri keppni og það gekk svona frábærlega.“
Helgi segir að draumurinn sé að geta hafið útflutning á vörum brugghússins og þátttaka og gott gengi í slíkum keppnum geti skipt höfuðmáli í því sambandi.
„Ég heyrði einmitt af því að einn dómarinn var yfir sig ánægður að landinn okkar gaf honum ekki hreinan hroll eins og landi afa hans á sínum tíma. Í grunninn er landinn einmitt bandarískt fyrirbæri og þar í landi er þetta moonshine beinlínis ákveðið vörumerki og það mikil menning í kringum þetta þar. Við erum nú að skoða það að koma vörum okkar í verslanir í Bandaríkjunum og verðlaun sem þessi hjálpa okkur að komast með fótinn innfyrir dyrnar því nóg er samkeppnin á þessum markaði.“
