Íþróttir helgarinnar: Þróttur á toppnum í karlablakinu
Þróttur er í efsta sæti Mikasa deildar karla í blaki eftir tvo sigra á Aftureldingu um helgina. Körfuknattleikslið Hattar tapaði fyrir Breiðabliki í fyrstu umferð fyrstu deildar karla.Lið Aftureldingar var vængbrotið með tvo leikmenn í banni eftir uppþot í leik liðsins gegn Stjörnunni helgina áður. Fyrri leikurinn var á föstudagskvöld og hann vann Þróttur 1-3; 22-25, 22-25, 25-21 og 25-22.
Liðin mættust aftur á laugardaginn. Hópur Þróttar var þá frekar þunnur, aðeins sex leikmenn tiltæknir, þar sem Geir Hlöðversson handarbrotnaði í fyrri leiknum eftir árekstur við samherja og Stefán Jóhannsson var farinn erlendis sem skíðaþjálfari.
Þróttur vann samt fyrstu tvær hrinurnar 25-19 og 25-18. Í þeirri þriðju hrinu tognaði einn leikmanna liðsins á ökkla en þar sem engir varamenn voru tiltækir varð hann að harka af sér og klára leikinn. Þá hrinu vann Afturelding 13-25.
Mosfellingar náðu samt ekki að nýta sér tækifærið og Þróttur vann fjórðu hrinuna 25-22. Liðið er efst í deildinni með átta stig eftir tvo leiki en næstu lið eiga leiki til góða.
Höttur heimsótti Breiðablik þegar keppni í fyrstu deild karla í körfuknattleik hófst á föstudagskvöld og tapaði 80-72 í hörkuleik. Blikar voru yfir eftir fyrsta leikhluta, 24-19 en í hálfleik 39-37.
Hattarmenn snéru leiknum sér í hag í þriðja leikhluta og voru 58-59 yfir að honum loknum. Eftir tæplega fjögurra mínútna leik í loka leikhlutanum voru þeir komnir með tíu stiga forskot, 61-71.
Þá hrökk hins vegar allt í baklás. Tveimur mínútum síðar voru Blikar búnir að jafna og héldu áfram á sömu braut þar sem Hattarmenn skoruðu aðeins eitt stig seinni hluta leikhlutans.
Bandaríkjamaðurinn Jerry Lewis Hollis skoraði 16 af þeim 19 stigum sem Blikar skoruðu á þessum kafla en hann skoraði alls 37 stig í leiknum og tók 17 fráköst.
Austin Bracey skoraði 21 stig fyrir Hött og Frisco Sandidge 17, auk þess sem hann tók 12 fráköst og stal boltanum fimm sinnum.
