Knattspyrna: KFA afgreiddi Hött/Huginn með þremur mörkum á átta mínútum - Myndir
Knattspyrnufélag Austfjarða er komið í 8 liða úrslit bikarkeppni neðri deilda karla eftir 3-0 sigur á Hetti/Huginn á Eskifjarðarvelli í gærkvöldi.KFA gerði út um leikinn með þremur mörkum á átta mínútum undir lok fyrri hálfleiks. Það fyrsta skoraði Esteban Selpa með skoti utan teigs á 30. mínútu.
Skömmu áður hafði hlaupið hiti í leikinn eftir harkalega tæklingu á Brynjar Þorra Magnússon, leikmann Hattar/Hugins. Við það virtist einbeiting gestanna dala. Brynjar Þorri haltraði áfram en fór meiddur út í hálfleik.
Þá hafði KFA skorað tvö mörk í viðbót. Danilo Milenkovic skoraði það fyrra á 37. mínútu þegar hann fylgdi eftir vítaspyrnu Marteins Más Sverrissonar sem Aleksandar Marinkovic hafði varið en fyrir markið. Mínútu síðar kom þriðja markið þegar Aleksandar misreiknaði hornspyrnu og Unnar Ari Hansson skallaði boltann inn af fjærstöng.
Um er að ræða nýja keppni sem kennd er við vefinn Fotbolti.net. Þar keppa lið úr 2. 3. og 4. deild. Austfjarðaliðin tvö eiga næst leiki í 2. deildinni á þriðjudag. Fjarðabyggð heimsækir Fjallabyggð en Höttur/Huginn tekur á móti Völsungi.
Myndir: Unnar Erlingsson
