Körfubolti: Tindastóll með yfirburði gegn Hetti - Myndir
Tindastóll vann Hött 67-91 í fyrstu deild karla í körfuknattleik á Egilsstöðum í gærkvöldi. Tindastólsliðið spilaði frábæra vörn allan leikinn sem slakir Hattarmenn áttu engin svör við. Þjálfari Hattar sagði liðið einfaldlega hafa verið „lélegt"Leikurinn átti upphaflega að fara fram á föstudagskvöld en flug seinni partinn féll niður þannig að dómararnir komust ekki til leiks. Þeir komust hins vegar austur seinni partinn í dag.
Höttur spilaði ágætlega í fyrsta leikhluta og góður hraði var í leik liðsins. Í lok fjórðungsins náðu gestirnir þó undirtökunum og voru yfir að honum loknum 19-26.
Þeir fóru þá að beita pressuvörn sem Hattarmenn náðu ekki að spila sig í gegnum. Þeir töpuðum boltanum gjarnan eða skot þeirra úr teignum geiguðu. Tindastólsmenn voru því komnir með 37-50 forskot í hálfleik.
Austin Bracy dró vagninn framan af fyrir Hött og Hreinn Gunnar Birgisson, sem kom frá Tindastóli í sumar, spilaði ágætlega gegn sínum gömlu félögum. Þegar hægja tók þeim var fátt um fína drætti hjá Hetti.
Úrslitin voru því ráðin í lok þriðja leikhluta en staðan þá var 45-71. Gerald Robinson spilaði sinn fyrsta leik með Hetti en illa gekk að koma honum í gang enda spiluðu Tindastólsmenn fasta vörn gegn honum.
Viðar Örn Hafsteinsson, þjálfari Hattar, mun vænta meira frá honum í næstu leikjum en það sama má segja um alla liðsfélaga hans.
„Við vorum afspyrnudaprir. Tindastólsmenn voru góðir en komu okkur ekki á óvart. Við gerðum ekki eins og við ræddum heldur vorum hauslausir og hentum frá okkur boltanum. Þetta er liðsíþrótt og það hefðu allir getað sýnt meira. Það þýðir ekki að benda á einhvern einn," sagði Viðar í samtali við Austurfrétt eftir leikinn.
Austin Bracey var stigahæstur Hattarmanna með 20 stig. Robinson skoraði 17 stig og tók átta fráköst og Eysteinn Bjarni Ævarsson skoraði 11 stig og tók sömuleiðis 8 fráköst.
Antoine Proctor skoraið 25 stig fyrir Tindastól og Þráinn Gíslason 15. Þá hirti Darrel Flake tólf fráköst. Tindastólsmenn mættu með ellefu manna hóp, sem er sennilega sá stærsti sem sést hefur á Egilsstöðum í vetur og gátu notað tækifærið til að gefa flestum tækifæri.
