Ungliðar björgunarsveitanna á sameiginlegri æfingu í Berufirði
Á sjötta tug unglinga var saman kominn á Lindarbrekku í Berufirði um síðustu helgi og var erindið sameiginleg þjálfun. Voru þetta unglingar innan björgunarsveita á Austurlandi og komu frá Neskaupstað, Eskifirði, Reyðarfirði, Fáskrúðsfirði og Djúpavogi.
Verkefni helgarinnar voru mörg. Til dæmis að síga í kletta, búa um slasaða á börum til flutnings, leita að snjóflóðaýlum og margt fleira.
Í lok dags opnaði Djúpavogshreppur sundlaugina sérstaklega til þess að geta boðið hópnum í sund og um kvöldið var svo slegið upp grillveislu.
Þátttakendur í þessari samæfingu voru alls 64 með umsjónarmönnum. Upphafsmaðurinn að þessari uppákomu var Snjólaug Eyrún Guðmundsson frá Lindarbrekku en hún er umsjónarmaður unglingadeildarinnar Ársólar á Reyðarfirði.
Ljósmynd/Magnús Kristjánsson-www.djupivogur.is
