Undarleg tilfinning að eiga app á Apple Store
„Ég hef alltaf haft áhuga á forritun og hönnun,“ segir Sara Kolodziejczyk, sem gaf nýverið út snjallsímaforritið „Perlur Hiking Treasures“ sem er upplýsingaforrit um Perlur Fljótsdalshéraðs en verkefnið var útskriftarverkefni hennar við Menntaskólann á Egilsstöðum.
Perlurnar eru samansafn 28 merktra gönguleiða innan Fljótsdalshéraðs sem hafa notið mikilla vinsælda heimamanna og gesta á svæðinu en þær hafa bæði verið gefnar út í bæklingi, verið aðgengilegar gegnum WAPP-gönguleiðaforritið og nú bæði á Apple Store og Google Play Store, á íslensku og ensku, undir nafninu „Perlur Hiking Treasures“.
Hvernig kviknaði hugmyndin? „Við fjölskyldan vorum í sumarfríi á Tenerife í fyrrasumar og ég var orðin frekar stressuð yfir því að vera ekki komin með neina hugmynd að lokaverkefni. Eitt kvöldið vorum við á gangi í verslunarmiðstöð þar sem ég rak augun í auglýsingaskjá þar sem verið var að auglýsa eftir fólki til að hanna vefsíður, snjallsímaforrit og bæklinga. Þar kviknaði hugmyndin; að gera snjallsímaforrit sem myndi nýtast litla samfélaginu okkar á einhvern hátt. Ég vissi að það væru margir sem ganga eftir Perlubæklingnum en í honum er gönguleikur þar sem veglegir vinningar eru í boði. Appið mitt er í rauninni bæklingurinn á rafrænu formi en það eru alltaf fleiri sem nýta sér tæknina og því þægilegt að hafa þetta bara í símanum sem maður er alltaf með á sér,“ segir Sara.
Stefnir á hugbúnaðarverkfræði
Sara útskrifaðist um jólin af náttúrufræðibraut, verkfræðilínu, og var snjallforritið hennar lokaverkefnið í skólanum. Hún stefnir á hugbúnaðarverkfræði í Háskólanum í Reykjavík í haust. Ég hafði ekki hugmynd um neitt og vissi ekkert hvernig ég ætti að fara að þessu. Ég byrjaði að skoða þetta í sumar, fann mér síðu og gerði appið á henni. Svo þegar ég byrjaði að skoða þetta af einhverri alvöru í haust áttaði ég mig fljótlega á því að þetta var miklu meira og erfiðara verkefni en ég bjóst við. Ég þurfti bara að læra á þetta og klára þetta eins fljótt og ég gat en var oft við það að gefast upp. En þetta var mjög skemmtilegt og ég lærði rosalega mikið, líka bara á sjálfa mig, en ég vissi ekki að ég gæti gert eitthvað svona og kom sjálfri mér rosalega mikið á óvart.“
Sara segir það mjög sérstaka tilfinningu að eiga sitt eigið snjallforrit í Apple Store og Google Play Store. „Ég man fyrst þegar þetta var komið upp á Play Store en pabbi minn er með Android-síma. Þegar hann kom heim úr vinnunni sagði ég við hann: „Getur þú kannski opnað appið mitt í símanum þínum?“ Þetta hljómaði eitthvað svo undarlega, appið mitt! Mjög furðuleg en skemmtileg tilfinning.“
Ætlar að ganga sem flestar perlur í sumar
Á Sara sér einhverja uppáhaldsperlu? „Það er klárlega Þerribjarg eða Landsendi. Ég hef farið þangað nokkuð oft, þar á meðal til að smala á haustin. Ég á hins vegar margar minningar úr Húsey, þar sem gamall bekkjarfélagi minn og vinur býr, þannig að sá staður er líka ofarlega á lista. Ég hef hins vegar sett mér það markmið að reyna að ganga eins margar Perlur og ég get í sumar en það er til skammar að hafa bara skoðað nokkrar þeirra en samt búið til snjallsímaforrit um þær allar! Mig langar mjög mikið í Stórurð aftur en ég byrja líklegast á Strútsfossi sem er einstaklega fallegur.“
