Nýr atvinnumálafulltrúi á Fljótsdalshéraði
Á fundi atvinnumálanefndar Fljótsdalshéraðs í gær var ákveðið að ganga til samninga við Þórarinn Egil Sveinsson, í starf atvinnufulltrúa sveitarfélagsins. Alls barst 41 umsókn um starfið, en umsóknarfrestur rann út 6. febrúar síðastliðinn.
Helstu verkefni og ábyrgðarsvið atvinnufulltrúa eru að vinna að þróun sérstakra atvinnuverkefna, meðal annars á sviði ferðamála, að stýra kynningar- og markaðsmálum sveitarfélagsins, vinna að framkvæmd atvinnumálastefnu þess og vera tengiliður Fljótsdalshéraðs við atvinnulífið og stoðstofnanir þess.
Þórarinn Egill er með masterspróf á sviði iðnaðar- og matvælaverkfræði. Undanfarin ár hefur hann rekið eigið fyrirtæki á sviði ráðgjafar og verkefnastjórnunar. Þórarinn hefur unnið ýmis ráðgjafarstörf fyrir Bændasamtök Íslands, hann var á árunum 2000 til 2003 forstöðumaður Matvælaseturs Háskólans á Akureyri og kennari við skólann. Á árabilinu milli 1979 og 2000 var Þórarinn aðstoðarkaupfélagsstjóri hjá KEA og þar áður mjólkursamlagsstjóri á Akureyri. Hann hefur gegnt formennsku og stjórnarsetu í ýmsum nefndum og ráðum á vegum fyrirtækja og stofnana.
