Eitt og annað til afþreyingar yfir sumarsólstöðuhelgina
Það vel til marks um að allt er að vakna til lífs á Austurlandi að þrátt fyrir hátíðarhöld víða fyrr í vikunni vegna bæði Þjóðhátíðardagsins og Kvenréttindadagsins er engu að síður fjölmargt í boði um helgina fyrir þá sem vilja komast út úr húsi.
Stærstu viðburðirnir eru tveir að þessu sinni og báðir fara fram á morgun laugardag.
Annars vegar er þar um að ræða Sumarsólstöðuhátíð Skaftfells á Seyðisfirði sem er heiti yfir líflega götuhátíð með ýmsum gjörningum og úrvali afþreyingar fyrir unga sem aldna. Hefst fjörið síðdegis klukkan 17 og endar með tónlist og dansi á götum úti um klukkan 22. Viðamikil sýning tileinkuð Jóhannesi Kjarval opnaði fyrr í vikunni í Skaftfelli svona ef hátíðin utandyra dugar ekki til fyrir listunnendur.
Sama daginn verður blásið í lúðra vegna Skógardagsins mikla í Mörkinni í Hallormsstaðaskógi en sá viðburður er fyrir löngu orðinn landsþekktur og trekkir að marga. Dagskráin hefst um hádegisbil með Skógarhöggskeppninni og í kjölfar er vegleg dagskrá langt fram eftir deginum. Allt endar svo með risagrilli og gómsætum veitingum sem fólki gefst færi á að smakka.
Út og suður
Séu gönguferðir og útivist í uppáhaldi er þetta aldeilis fín helgi framundan. Í Múlaþingi verður Ferðafélag Fljótsdalshéraðs með Sólstöðugöngu sína í Stapavík við Héraðsflóann. Brottför frá skrifstofu ferðafélagsins klukkan 20 í kvöld og ekið að bænum Unaósi þaðan sem tíu kílómetra gangan er nokkuð létt á fótinn.
Þá er það á morgun sem opinber gönguvika Fjarðabyggðar hefst með sérstakri göngu- og bátsferð á Barðsneshorn og í kjölfar þeirrar ferðar haldin kvöldvaka í Sjóhúsi Randulffs á Eskifirði. Á sunnudeginum er í boði það sem kallað hefur verið Helförin sem er um 20 kílómetra túr milli Eskifjarðar og Reyðarfjarðar. Skemmri göngutúr er einnig í boði klukkan 16 frá Íslenska stríðsárasafninu þar sem einnig fer fram kvöldvaka að göngu lokinni.
Ljúfir tónar
Vitaskuld verður hægt að njóta tónlistar á hinum ýmsu börum og samkomustöðum eins og venjulega. Tónlistarmaðurinn Ívar Klausen ætlar að tralla og tjútta fyrir lýðinn og það bæði í Tehúsinu á Egilsstöðum í kvöld klukkan 20.30 og endurtekur leikinn annað kvöld í Tónspili í Neskaupstað á sama tíma. Honum til aðstoðar að gleðja gesti verður Hjálmar Carl.
Á Tehúsinu á laugardagskvöld mun hópurinn Krauka spila fyrir gesti en það band spilar eingöngu á hljóðfæri frá Víkingatímanum og vakið töluverða athygli víða um heim. Hægt verður að skoða hljóðfærin sjálf að tónleikunum loknum en þeir hefjast 20.30
Mynd frá Sumarsólstöðuhátíð Skaftfells á síðasta ári en hátíðin verður haldin í þriðja sinn nú um helgina. Mynd Skaftfell
