Búinn að keyra um Austurland og mála það sem fyrir augu ber
Myndlistarmaðurinn Sindri Dýrason opnar á morgun listsýningu í Vallaneskirkju. Sindri, sem stundar nám á Hallormsstað, segist fá innblástur af því að keyra um Austurland. Í mestu uppáhaldi eru þó fjöllin á Seyðisfirði þar sem hann er alinn upp.
„Ég ólst upp á Seyðisfirði en flutti síðan til Reykjavíkur og hef eftir það búið nánast alls staðar nema á Austurlandi. Mig langaði að koma aftur austur og skráði mig í skapandi sjálfbærni við Háskóla Íslands á Hallormsstað.
Skólastýrurnar hér voru svo vinsamlegar að veita mér aðgang að herbergi þar sem ég hef komið upp stúdíó. Ég hef málað á hverjum degi síðan ég kom.
Ég keyri um Austurland og mála það sem ég sé. Myndirnar eru meðal annars innblásnar af Kjarval, ég hef farið á slóðir hans í Kjarvalshvamm og á Borgarfjörð. Síðan hef ég Lagarfljótið og Snæfellið hér alltaf fyrir augunum,“ segir Sindri.
Í einni ferðinni kom Sindri við í Vallaneskirkju. „Mér leist vel á þannig ég fór í símaskrána og hringdi í Eymund (Magnússon, bónda). Hann er mikill listunnandi og því afar opinn fyrir hugmyndinni,“ segir Sindri.
Sindri útskrifaðist með BA-gráðu frá Listaháskóla Íslands árið 2023. Hann hefur síðan haldið sýningar bæði hérlendis og í Noregi en ein þeirra var á Vesturvegg Skaftfells í vor.
Á sýningunni verða níu málverk og nokkrar teikningar. Opnunin verður á morgun frá klukkan 17-20. Á henni mun Guðrún Veturliðadóttir, tónlistarkennari á Seyðisfirði, spila á gítar og syngja. Sýningin sjálf verður síðan í kirkjunni út veturinn.
