Björg Einarsdóttir hlaut menningarverðlaun SSA
Samband sveitarfélaga á Austurlandi (SSA) veitti á fimmtudaginn var Björgu Einarsdóttur, menningarfrumkvöðli á Vopnafirði, mennningarverðlaunin 2025 en þau eru árlega veitt einstaklingi, stofnun eða samtökum sem fram úr skara á sviði lista eða menningar í fjórðungnum.
Björgu þekkja margir en hún hefur um áraraðir starfað sem safnstjóri og staðarhaldari að Bustarfelli og þar unnið margt gott starfið sem oft á tíðum var í hreinni sjálfboðavinnu. Lét hún af því starfi á síðasta ári.
Það þó fjarri því það eina sem Björg hefur komið að gegnum tíðina eins og fram kom í ræðu Berglindar Hörpu Svavarsdóttur, formanns SSA, á haustþingi sambandsins í síðustu viku.
„Auk starfs við safnið hefur Björg tekið virkan þátt í samfélagsmálum á Vopnafirði, meðal annars í kvenfélagi, veiðifélagi og safnaðarstarfi. Hún hefur komið að fjölda sýninga og fræðsluverkefna og unnið að útgáfu rita um Bustarfell og sögu svæðisins. Störf sín fyrir safnið hefur Björg unnið af alúð og umhyggju og hefur hún alltaf borið hag Minjasafnsins fyrir brjósti.“
