Urriðavatnssund: Kalt þegar maður kom fyrst ofan í
Ingunn Eir Andrésdóttir frá Eskifirði kom fyrst í mark í hálfu Urriðavatnssundi sem synt var í áttunda sinn á laugardag. Aðstæður í sundinu hafa trúlega aldrei verið erfiðari.
Vindurinn var austanstæður, 10 m/s á laugardagsmorgun, í raun eftir endilöngu vatninu á móti keppendum á fyrri hluta leiðar þeirra sem þýddi að öldugangur var töluverður.
Fullt sund er vanalega 2,5 km en var stytt í 1,5 km vegna aðstæðna. Yfir 90 keppendur luku þó sundinu.
Ingunn Eir Andrésdóttir, sundþjálfari frá Eskifirði, er vanari að synda í sundlaugum og skráði sig því í hálft sund í sínu fyrsta Urriðavatnssundi.
„Ég var eiginlega við það að hætta við þegar ég sá veðrið í morgun og eins þegar ég var komin hingað. Þegar ég fór ofan í gekk sundið hins vegar betur en ég þorði að vona,“ segir Ingunn sem synti stutta sundið á 13,48 mínútum.
„Það var kalt þegar maður fór fyrst ofan í en svo lagaðist það. Aldan var auðveldari viðureignar en ég óttaðist, það fór svolítið vatn upp í mann en það var allt í lagi. Ég hefði alveg viljað fara í lengra sundið.
Gleraugun voru stærsta vandamálið. Það var móða á þeim þannig ég sá ekki neitt og var aðeins að villast. Ég þarf klárlega betri gleraugu áður en ég syndi næst í svona vatni.“
Frekari úrslit Urriðavatnssundsins má finna hér.
