Þrenn gullverðlaun á unglingameistaramóti á skíðum
Íþróttir • This email address is being protected from spambots. You need JavaScript enabled to view it. • Fyrst birt 30. mar 2023 08:57 • Uppfært 30. mar 2023 14:18
Skíðafólk úr UÍA kom heim með þrenn gullverðlaun auk þess að ná þriðja sætinu í stigakeppni félaga á Unglingameistaramóti Íslands í skíðum. Mótið var haldið í Bláfjöllum um síðustu helgi.
Eyvindur H. Warén varð tvöfaldur unglingameistari. Annars vegar í samhliða svigi, hins vegar stórsvigi drengja 14-15 ára.
Rakel Lilja Sigurðardóttir varð unglingameistari í samhliða svigi stúlkna 12-13 ára. Þar endaði Katrín María Jónsdóttir í þriðja sæti. Rakel Lilja varð einnig önnur í svigi og þriðja í stórsvigi.
Fleiri verðlaun skiluðu sér í hús hjá keppendum UÍA því Hrefna Lára Zoëga varð önnur í svigi 14-15 ára stúlkna.
Undir merkjum UÍA keppir skíðafólk sem æfir með Skíðafélaginu í Stafdal og Skíðafélagi Fjarðabyggðar. Næsta stóra verkefni austfirsks skíðafólks eru Andrésar Andarleikarnir á Akureyri eftir þrjár vikur.
Eyvindur á efsta palli eftir stórsvigið. Mynd: Skíðadeild Ármanns
