Stökk inn í landsliðshóp
Mikael Máni Freysson, Ungmennafélaginu Þristi, komst í gær í landshóp Íslands sem tekur þátt í Norðurlandamóti 20 ára og yngri í næsta mánuði. Sæti hans í liðinu er þó ekki gulltryggt.
Mikael Máni stökk 13,39 metra í þrístökk en þurfti að stökkva yfir 12,90. Aðrir geta þó enn bætt árangur hans og náð sætinu.
Ísland og Danmörk senda sameiginlegt lið til keppni á mótinu í UMEÅ í Svíþjóð um miðjan ágúst. Tveir geta keppt í hverri grein og skiptir árangur tímabilsins fram til 1. ágúst máli. Máni hefur átt í harðri samkeppni við Guðmund Smára Daníelsson, UMSE, um sæti í liðinu.
Máni er bjartsýnn á að komast á mótið eftir góða stökkseríu í gær. „Samkeppnin um sæti í liðinu er hörð en ég vonast eftir að fá að keppa fyrir Íslands hönd á mótinu. Það væri mikill heiður,“ segir Máni sem ekki hefur áður keppt á Norðurlandamóti.
