„Skíði hafa fylgt mér alla tíð“

Hrefna Lára er alin upp í Neskaupstað og hefur því æft undir merkjum Þróttar og Skíðafélags Fjarðabyggðar. Síðasta haust fór hún norður til Akureyrar í framhaldsskóla, meðal annars til að geta lagt betri rækt við skíðin.

„Oddsskarð er alls ekki verri staður en Hlíðarfjall en munurinn liggur í að hér fyrir norðan eru fleiri þjálfarar og þar með fleiri tækifæri og ekki síst að hér er ég með jafnöldrum á æfingum sem sýnir mér miklu betur hvar ég er stödd í mínu sporti en þegar ég er að æfa með hinum og þessum aldurshópum eins og raunin er mikið til heima á Austurlandi,“ segir hún.

Hrefna Lára snéri heim í Oddsskarð um síðustu helgi þegar Íslandsmótið í alpagreinum í flokki fullorðinna var haldið þar, en þetta er í fyrsta sinn sem Austfirðingar halda Íslandsmótið. Hrefna Lára varð fjórða í svigi, fimmta í stórsvigi og þriðja í alpatvíkeppni, það er samanlögðum árangri úr svigi og stórsvigi.

Þó að Hrefna Lára, líkt og önnur börn og ungmenni, hafi prófað eina og aðra íþróttina í gegnum tíðina hefur ekkert annað áhugamál náð að grípa hana frá unga aldri að hennar sögn. Skíðamennskan hafi verið númer 1, 2 og 3 frá því að hún muni eftir sér og sé það enn þann dag í dag.

„Ég kann svo sem enga sérstaka skýringu á því hvers vegna ég er svona hrifin af skíðaíþróttum. En áhuginn hefur fylgt mér allar götur frá því að ég fór fyrst með fjölskyldunni í brekkurnar á unga aldri og hann fylgir mér enn. Á meðan svo er vil ég endilega reyna að gera sem mest af þessu.“

Lengri útgáfa birtist í Austurglugganum. Hægt er að panta áskrift hér.