Körfubolti: Höttur vann KR
Íþróttir • This email address is being protected from spambots. You need JavaScript enabled to view it. • Fyrst birt 07. nóv 2022 10:30 • Uppfært 07. nóv 2022 12:04
Höttur vann KR í úrvalsdeild karla í körfuknattleik á föstudagskvöld, 72-83. Hattarliðið var með KR í greipum sér allt frá þriðju mínútu leiksins.
KR skoraði fyrstu fjögur stig leiksins en það breytti því ekki að Höttur var kominn yfir, 6-7 eftir þrjár mínútur. Eftir fyrsta leikhluta var staðan 17-21.
Sinni mestu forustu í leiknum náði Höttur um miðjan annan leikhluta, var þá 12 stigum yfir, 24-38. KR minnkaði muninn hins vegar áður fyrir leikhlé niður í 34-40. Sá munur hélst í gegnum þriðja leikhluta en staðan að honum loknum var 58-64.
Snemma í lokafjórðungi minnkaði KR muninn niður í 65-66. Aldrei varð þó jafnt, hvað þá að KR kæmist yfir heldur var allur vindur úr liðinu skömmu síðar. Höttur skoraði þá níu stig í röð og breytti stöðunni úr 67-69 í 67-78. Lokatölurnar urðu sem fyrr segir 72-83.
Tim Guers var stigahæstur hjá Hetti með 16 stig og Obie Trotter, sem nú er að vakna til lífsins í stigaskorun eftir að hafa farið hægt af stað, skoraði 14. Nemanja Knezevic skoraði 10 stig og tók 12 fráköst.
Hlé verður nú á deildinni vegna landsleikja og eru því tvær vikur í næsta leik Hattar, gegn Stjörnunni á heimavelli. Liðið er jafnt fjórum öðrum í 4. – 7. sæti með sex stig. Höttur hefur unnið þrjá leiki í röð eftir að hafa tapað fyrstu tveimur. Mun þetta vera í fyrsta sinn sem liðið er með jákvætt vinningshlutfall í úrvalsdeildinni auk þess sem liðið hafði ekki áður unnið KR.
