Þjálfari Hauka: Við erum tilbúnir í úrvalsdeildina
Íþróttir • This email address is being protected from spambots. You need JavaScript enabled to view it. • Fyrst birt 22. mar 2013 22:41 • Uppfært 08. jan 2016 19:24
Ívar Ásgrímsson, þjálfari Hauka sem tryggðu sér í kvöld sæti í úrvalsdeild karla á næsta tímabili með 70-98 sigri á Hetti á Egilsstöðum, segir liðið hafa sýnt styrk sinn með tíu leikja sigurgöngu eftir áramót. Það sé tilbúið í úrvalsdeildina.
„Ég bjóst ekki við þessu þegar ég tók við liðinu í fjórða sæti í desember. Eftir áramót höfum við spilað mjög vel og sýnt að við erum besta liðið í fyrstu deild. Við höfum unnið tíu leiki í röð og þá með að meðaltali með þrjátíu stigum,“ sagði Ívar í samtali við Austurfrétt eftir leikinn í kvöld.
Hann er hvergi banginn fyrir úrvalsdeildina á næstu leiktíð. „Við höfum spilað æfingaleiki við úrvalsdeildarlið og sýnt að við getum haft í fullu tré við þau þótt þau séu með tvo Bandaríkjamenn en við bara einn. Við mættum ÍR í bikarnum og þeir rétt höfðu okkur í lokin – þannig að já – við erum tilbúnir.“
Yfirburðir Hauka gegn Hetti í kvöld benda að minnsta kosti til þess að liðið sé orðið of gott fyrir fyrstu deildina. „Hattarmenn héldu sér inni í leiknum á þriggja stiga skotum. Þeir voru með ótrúlega nýtingu úr þeim í fyrri hálfleik. Annars áttu þeir engin svör við okkar leik.
Við spiluðum vel og vorum skynsamir. Hópurinn var breiður og allir skiluðu sínu. Hattarmenn voru orðnir þreyttir í lokin og réðu þá ekkert við okkur.“
