Fékk viðurkenninguna afhenta sautján árum síðar
Ívar Ingimarsson fékk um helgina afhenta viðurkenningu Morgunblaðsins sem leikmaður ársins á Íslandsmóti karla í knattspyrnu árið 1999.
Ívar spilaði það sumar hjá ÍBV og varð ásamt markverðinum Birki Kristinssyni efstur í einkunnagjöf íþróttafréttamanna Morgunblaðsins. Viðurkenningin markaði tímamót því aldrei áður höfðu tveir leikmenn sama liðs orðið í efsta sæti.
Birkir og Ívar fengu alls 19 M í 18 leikjum. Ekki náðist í Ívar við afhendingu verðlaunanna þar sem hann var staddur í Hollandi við æfingar. Síðasta setning fréttar Morgunblaðsins um verðlaunin er: „Þeir fá viðurkenningar sínar afhentar við fyrsta tækifæri.“
Viðurkenninguna fékk Ívar loks afhenta á herrakvöldi Hattar síðastliðið laugardagskvöld.
Að loknu tímabilinu 1999, þar sem ÍBV varð í öðru sæti Íslandsmótsins, var Ívar lánaður til Torquay í Englandi áður en hann skiptir yfir í Brentford. Þar með var hafinn atvinnumannsferill hans sem stóð til ársins 2012.
Mynd: Höttur
