Eyvindur Warén á Ólympíuleika æskunnar
Íþróttir • This email address is being protected from spambots. You need JavaScript enabled to view it. • Fyrst birt 05. feb 2025 12:19 • Uppfært 05. feb 2025 15:43
Skíðamaðurinn Eyvindur Halldórsson Warén frá Fljótsdalshéraði verður meðal fulltrúa Íslands á Vetrarólympíuhátíð Evrópuæskunnar sem haldin er í Georgíu í næstu viku.
Ísland sendi alls 15 þátttakendur á mótið sem haldið er í borginni Bakuriani. Eyvindur er einn af átta keppendum í alpagreinum. Alpagreinafólkið leggur af stað til Georgíu á morgun.
Leikarnir hefjast á sunnudag en keppni í alpagreinum á mánudag. Þá verður keppt í stórsvigi karla. Svigkeppni karla er síðan á fimmtudaginn eftir viku.
Eyvindur er skráður hjá Skíðasambandi Íslands á vegum UÍA en þannig keppa austfirskir skíðaiðkendur á landsvísu. Hann kemur upphaflega úr Skíðafélaginu í Stafdal en hefur síðustu vetur æft með Skíðafélagi Akureyrar enda er hann í námi í Verkmenntaskólanum á Akureyri.
Síðasta mót Eyvindar fyrir leikana var á Dalvík um miðjan janúar. Þar komst hann á verðlaunapall í sínum flokki og fullorðinsflokki í svigi.
Mynd: Aðsend/Pedromyndir
