Blak: Þróttur mætir HK í úrslitakeppninni
Bæði karla og kvennalið Þróttar mæta HK í undanúrslitum Íslandsmótsins í blaki. Deildakeppninni lauk um liðna helgi.
Kvennaliðið spilaði við Aftureldingu á föstudagskvöld og tapaði 3-1 þrátt fyrir að hafa unnið fyrstu hrinuna. Heimaliðið tryggði sér deildarmeistaratitilinn með sigrinum.
Þróttarstelpur enduðu í þriðja sæti og mæta því HK sem varð í öðru sæti í úrslitakeppninni. Fyrsti leikurinn verður syðra þann 11. apríl en Þróttur á heimaleik að kvöldi miðvikudagsins 13. apríl.
Strákarnir spiluðu einnig við Aftureldingu og unnu 0-3 á föstudagskvöld en töpuðu í oddahrinu á laugardag. Fjórða sæti deildarinnar var þar með þeirra hlutskipti.
Andstæðingarnir verða því deildarmeistarar HK. Fyrst verður leikið í Kópavogi 10. apríl en í Neskaupstað þriðjudagskvöldið 12. apríl.
Þau lið sem fyrr vinna tvær viðureignir komast áfram í úrslit.
