Blak: Þróttur hafði ekki við KA
Íþróttir • This email address is being protected from spambots. You need JavaScript enabled to view it. • Fyrst birt 14. des 2023 09:51 • Uppfært 14. des 2023 10:17
Lið Þróttar í úrvalsdeild kvenna í blaki tapaði 0-3 fyrir KA í gærkvöldi á heimavelli í síðasta leik sínum í deildinni á þessu ári.
KA hafði góð tök á leiknum í gærkvöldi, vann fyrstu hrinu 17-25, aðra hrinu 15-25 og þá þriðju 18-25. Heiðbrá Björgvinsdóttir var stigahæst Norðfirðinga með 11 stig en Lucia Carrasco skoraði 10. Helena Kristín Gunnarsdóttir, sem eins og fleiri leikmenn KA er alin upp hjá Þrótti, var hvað atkvæðamest Akureyrarliðsins með 19 stig.
Út frá tölfræðigreiningu leiksins má eins og í öðrum leikjum í haust greina mun á sóknarleik Þróttar og andstæðinga þeirra. Í gærkvöldi skoraði Þróttur 26 stig úr smössum en KA 40.
Lið Þróttar er nú komið í jólafrí en á eftir tvo leiki í byrjun nýs árs áður en deildinni verður skipt í tvennt. Liðið er með fjögur stig í 7. sæti og ljóst að það verður í neðri hlutanum eftir áramót.
Karlalið Þróttar tekur á móti Stál-Úlfi í kvöld. Á Egilsstöðum fær Höttur Álftanes í heimsókn í úrvalsdeild karla í körfuknattleik.
Mynd: Blakdeild Þróttar/Sigga Þrúða
