Blak: Luku deildakeppninni á sigrum á Þrótti R./Fylki
Karlalið Þróttar Neskaupstað spilaði um helgina síðustu leiki sína í Mizuno-deild karla í blaki. Þeir voru gegn sameiginlegu liði Þróttar R. og Fylkis. Þeir unnust báðir en með talsverðri fyrirhöfn.
Fyrri leikurinn var á laugardag og vannst hann 2-3. Reykjavíkurliðið hafði yfirburði í fyrstu hrinunni 25-14 en Þróttur svaraði strax 11-25. Heimaliðið vann þriðju hrinu 25-23 en Norðfjarðarliðið þá fjórðu 15-25.
Var þá komið að einhverri æsilegustu oddahrinu sem sögur fara af í lengri tíma en Norðfjarðarliðið vann hana 20-22. Vanalega þarf aðeins 15 stig til að vinna oddahrinu en hana verður að vinna með tveggja stiga mun og sá munur var lengi að nást.
Seinni leikurinn var í gær og hann vann Þróttur Neskaupstað 1-3 eða 22-25, 13-25, 25-15, 17-25.
Endanleg staða deildarinnar er ljós þótt topplið HK og Stjörnunnar eigi enn einn leik eftir. Þróttur endar í þriðja sæti og mætir HK í úrslitakeppninni. Fyrsti leikurinn verður næsta laugardag í Fagralundi.
