Blak: Algjörir yfirburðir KA
Þróttur átti ekki roð í KA þegar liðin mættust í úrvalsdeild kvenna í blaki á Akureyri í gærkvöldi. KA vann leikinn 3-0 og hafði yfirburði í öllum hrinum.
KA gaf tóninn með að skora fyrstu sex stig leiksins. Liðið bætti stöðugt í forskotið og vann hrinuna 25-10.
Í annarri hrinu átti Þróttur fyrstu stigin en komst ekki langt áður en KA náði frumkvæðinu og vann 25-15. Í þriðju hrinu komst KA í 8-1 og leit aldrei um öxl heldur vann hana 25-9.
Þróttarliðið er á botni deildarinnar en hefur aðeins leikið þrjá leiki, alla gegn þeim liðum sem virðast ætla að verða sterkust í vetur, það er HK og KA. Sex lið eru í deildinni í vetur.
Framundan um helgina eru tveir leikir gegn Þrótti Reykjavík. Karlalið félaganna mætast einnig tvisvar. Allir leikirnir verða í Neskaupstað.
