Víðækar lokanir í Fjarðabyggð
Fjarðabyggð hefur gripið til víðtækra lokana í sveitarfélaginu vegna hertra sóttvarnarreglna. Engin kennsla verður í grunn- og tónlistarskólum, sundlaugar og íþróttamannvirki verða lokuð sem og skíðasvæðið í Oddskarði.Þetta kemur fram á vefsíðu Fjarðabyggðar. Hvað skólahald varðar segir að ljóst er að þær auknu sóttvarnaraðgerðir sem kynntar voru í gær munu hafa áhrif á skólastarf. Því verðar starfsdagar í dag og á morgun, föstudag, í grunnskólum Fjarðabyggðar og engin kennsla.
Unnið er að útgáfu reglugerðar varðandi skólastarf eftir páska og munu tilkynningar varðandi breytingar á því verða gefnar út um leið og reglugerðin liggur fyrir.
Þá segir á vefsíðunni að engin kennsla verður í tónlistarskólum fram að páskum
Hvað leikskólana varðar var starfsdagur í morgun í leikskólunum í Neskaupstað, á Eskifirði og Reyðarfirði þar sem aðlaga þarf skólastarfið að breyttum sóttvörnum. Þess þurfti ekki í Kærabæ á Fáskrúðsfirði og í leikskóladeildunum í Breiðdals- og Stöðvarfjarðarskóla verða þeir því með óbreytta opnun.
„Allir leikskólar munu eftir það verða opnir, en ljóst er að tillögurnar munu hafa áhrif á starfsemi þeirra,“ segir á vefsíðunni.
„Ef fólk á þess kost að hafa leikskólabörn heima til að létta undir með starfsemi leikskólanna er slíkt vel þegið.“
Þá eru foreldrar beðnir um að fylgjast með tilkynningum á heimasíðu Fjarðabyggðar og í tölvupósti um helgina varðandi aðra tilhögun skólastarfs.
Hvað sundlaugar og íþróttamannvirki varðar verða þau lokuð þar til létt verður á sóttvarnaraðgerðum.
