Vel gengur að ná Drangi á flot
Vel gengur að ná togskipinu Drangi á flot í Stöðvarfjarðarhöfn. Byrjað er að dæla sjó úr skipinu.Bjarni Stefán Vilhjálmsson hafnarvörður á Stöðvarfirði segir að undirbúningur að því að hífa Drang á flot hafi hafist um fimmleytið í morgun. Tveir öflugir kranar eru notaðir til verksins.
„Skutur skipsins er þegar kominn upp og byrjað er að dæla sjó úr því,“ segir Bjarni Stefán. „Það verður svo dælt áfram þar til allt skipið er komið upp.“
Fram kemur í máli hans að aðstæður við að ná Drangi á flot séu sæmilegar hvað veður varðar.
„Þegar búið verður að ná Drangi alveg á flot mun hann verða færður til í höfninni þar til ákveðið verður hvað á að gera við skipið,“ segir Bjarni Stefán.
Uppfært: Mjög vel hefur gengið að dæla úr Drangi í morgun og er skipið núna undir hádegið um það bil að komast á flot.
Mynd: Albert Ó. Geirsson