Vegurinn opinn í Berufirði
Búið er að opna veginn við Fossá í Berufirði sem lokaðist snemma í morgun þegar vatn og aur flæddu yfir hann.Í tilkynningu frá Vegagerðinni er fólk beðið um að sýna varkárni á svæðinu. Vegagerðarmenn eru með tæki á staðnum og geta brugðist við ef á þarf að halda.
Vatnsyfirborð árinnar hækkaði um 2,5 metra, tvöfaldaðist, frá klukkan átta í gærkvöldi þar til sex í morgun. Ekki hefur sjatnað í ánni síðan þá.
Þetta er í þriðja skiptið á innan við viku sem Hringvegurinn í Berufirði lokast vetna vatnavaxta. Rignt hefur duglega á svæðinu síðan í gærkvöldi og þótt vonast sé til að heldur dragi úr þegar líður á daginn er áfram útlit fyrir talsverða úrkomu næstu daga.
Uppfært: Klukkan hálf tíu sendi RARIK frá sér tilkynningu um að rafmagnslaust væri í Berufirði. Unnið væri að viðgerð og vonast til að rafmagn komist á sem fyrst.
