Úrkoma á Seyðisfirði 270 mm á 2 dögum
Frá kl. 9 að morgni mánudags og þar til nú er mæld úrkoma á Seyðisfirði um 270 mm.Þetta kemur fram á veðursíðunni Blika á Facebook. Þar segir að í nýlegu uppfærðu mati Veðurstofunnar á endurkomutíma úrkomu fyrir 43 stöðvar má heimfæra þetta úrkomumagn á 48 klukkustundum til 50 ára atburðar.
Á Austfjörðum rignir neðan um 400-600 m hæðar og lán í óláni að það skuli snjóa ofar. En á móti er óhjákvæmilega umtalsverð snjósöfnun til fjalla.
Spáin gerir ráð fyrir að heldur dragi úr í dag, en samt 30-40 mm á Seyðisfirði. Meiri rigning á láglendi hins vegar í nótt og á morgun og spáð 70-80 mm á 36 klst fram á miðjan föstudag.
„Samtals gætu þetta því orðið 450-500 mm á Seyðisfirði á um 10 dögum. Það telst vera aftakamikil (e. extreme) úrkoma á alla hérlenda mælikvarða,“ segir á vefsíðunni.
