Tvö hross dauð eftir ákeyrslu
Tvö hross drápust þegar ekið var inn í hrossastóð á Hringveginum skammt innan við Egilsstaði miðvikudagskvöld. Kvartanir hafa borist vegna hrossa á ferli á þessum slóðum.
Tveir voru í bílnum og má telja mildi að þeir hafi sloppið án meiðsla því bíllinn er gjörónýtur. Tvö hross úr stóðinu drápust hins vegar.
Dýralæknir kom á stað ásamt lögreglunni og kemur fram í bókun lögreglunnar að viðhaldi girðinga á svæðinu sé ábótavant. Þær upplýsingar fengust hjá lögreglu að mjög oft hefðu borist kvartanir út af hrossum á svæðinu.