Tafir á umferð yfir Fagradal vegna þáttagerðar
Tímabundnar lokanir verða á umferð yfir Fagradal frá klukkan 9:00-21:00 í dag þar sem tökur fara fram á þáttunum Fortitude.
Þetta er gert til að draga úr hljóðmengun á meðan tökuvélarnar eru í gangi.
Í tilkynningu frá tökuliðinu segir að reynt verði eftir fremsta megni að draga úr öllum töfum á umferð á meðan á þessu standi. Umferðinni verður stýrt í gegnum umrætt svæði og vonum við að ökumenn sýni tillit og gæti varúðar.
Beðist er velvirðingar á þeim töfum sem þetta kann að valda.
Síðar í dag verða einnig tökur við hlíðar Grænafells. Sökum þess verða tímabundnar vegalokanir á veginum að gönguleiðum Grænafells.
