„Það er sko kraftur í okkur“
„Við erum handviss um að HSK og Sunnlendingar skorist ekki undan og nái að gera enn betur,“ segir Örvar Jóhannsson, formaður Hugins, en perluð voru 1673 armbönd til stuðnings Krafti á Seyðisfirði um helgina.
Það voru Kraftur, Ungmenna- og íþróttasamband Austurlands og Huginn á Seyðisfirði sem stóðu fyrir perluviðburðinum. Um var að ræða þriðja leikinn í Perlubikarnum, en hann hreppir það íþróttafélag og/eða bæjarfélag sem nær að perla sem flest armbönd á tilteknum tíma. Armböndin eru seld til stuðnings Krafti og sýna einnig samstöðu með íslenska fótboltaliðinu á HM.
Slógu met Eyjamanna
Austfirðingar náðu að slá Eyjamenn út en Austfirðingar perluðu 1673 armbönd. Eyjamenn höfðu áður perlað 1538 armbönd en eins og staðan er í dag er Perlubikarinn í höndum Akureyringa sem perluðu 2302 armbönd á fjórum tímum.
„Um 150 manns mættu á perluviðburðinn á Seyðisfirði og stóð fólkið sig eins og hetjur en reikna má að hver hafi þá perlað meira en 11 armbönd. Við slógum Vestmannaeyinga út og erum því í öðru sæti núna í Perlubikarnum og værum ábyggilega í því fyrsta ef við miðuðum við höfðatölu - það er sko kraftur í okkur. En það er dásamlegt að taka þátt í þessu verkefni og skorum við nú á HSK og Sunnlendinga að gera betur og ná Perlubikarnum til sín,“ segir Örvar.
Armböndin eru til sölu á vefsíðu Krafts, hjá Útilíf, Errea, Jóa Útherja og Ölveri og rennur allur ágóði þeirra til stuðnings Krafti, stuðningsfélagi ungs fólks sem greinst hefur með krabbamein og aðstandendum.