Svona er umhorfs á Seyðisfirði – Myndir
Aurskriða féll á menningarmiðstöðina Skaftfell á Seyðisfirði og nálæg hús á fjórða tímanum í dag. Önnur skriða féll niður að húsum við Botnahlíð nokkru fyrr. Búið er að rýma íbúabyggð milli Búðarár og Dagmálalækjar.Skriðurnar koma í kjölfar mikilla rigninga á Austfjörðum síðustu daga. Eitthvert eignatjón hefur orðið í hamaganginum í dag en ekkert stórtjón né slys á fólki. Í tilkynningu frá lögreglu segir að skriða hafi náð að tveimur húsum hið minnsta og flætt hafi inn í nokkur.
Skriðan við Skaftfell er stærri og áætla sjónarvottar hana vera 20-40 metra breiða. Þá er um hálfs metra þykkur aur á götunni við húsið. Erfitt hefur þó verið að meta umfangið enda skall myrkur á nærri strax eftir að stærri skriðan féll. Verksummerkin koma því betur í ljós þegar birtir.
Hús voru rýmd í fjórum götum neðan við Botna. Fjöldahjálparstöð á vegum Rauða krossins var opnuð í Herðubreið. Hlúð var að þeim sem þangað leituðu en margir fóru beint til ættingja. Enn er mikil rigning á Seyðisfirði og óvissustig því enn í gildi. Von er á að heldur dragi úr úrkomunni á morgun en þó búist við að hún haldi eitthvað áfram fram að helgi. Óvíst er hvenær íbúar geta snúið til síns heima en staðan verður metin á morgun.
Meðan óvissustig ríkir eru íbúar hvattir til að fylgjast vel með tilkynningum lögreglu. Næst verður send tilkynning um klukkan tíu í fyrramálið.
Myndir: Ómar Bogason og Björgunarsveitin Ísólfur
