Starfsleyfi gefið út á Eiðum gegn vilyrði um lagfæringar
Heilbrigðiseftirlit Austurlands hefur gefið út starfsleyfi fyrir gistirými fyrir allt að 40 manns til tveggja ára á Eiðum. Úrbóta er þó þörf á fráveitumálum þar á starfsleyfistímanum.
Í nýjustu fundargerð heilbrigðisnefndar kemur fram að fyrirkomulag fráveitu á Eiðum sé ekki í samræmi við fráveitureglugerð.
Mjög mikil mengun hafi mælst í Eiðalæk við útrás fráveituvirkis neðan vegar, á svæði gamla Alþýðuskólans á Eiðum, og þar hefur nefndin ekki heimilað útgáfu samfelldrar starfsemi sem myndi auka álag á fráveituna.
Í byrjun sumars var hins vegar farið af stað með gistingu í húsnæði gamla barnaskólans sem er ofan vegar og þar hefur gerlafjöldi verið mun minni og verið gefin út leyfi fyrir skammtímastafsemi fyrir takmarkaðan fjölda fólks.
Áður bárust umsóknir um starfsleyfi í tveimur húsum á fráveitunni ofan vegar fyrir alls 40 gistirými. Áður en leyfin voru gefin út til tveggja ára var fengið vilyrði frá Hitaveitu Egilsstaða og Fella, sem sér um fráveituna, um úrbætur á starfsleyfistímanum.
Þá var starfsmönnum HAUST falið að fylgjast með álagi á fráveituna og gera kröfur um tíðari tæmingar rotþróarinnar ef aukin ummerki verða um álag.
Þá gaf heilbrigðisnefnd útgáfu tveggja starfsleyfa vegna sölu gistingar á Fljótsdalshéraði til loka maí á næsta ári þar sem eru einkavatnsveitur en þær þær uppfylla ekki alveg skilyrði þess að hægt sé að veita starfsleyfi þeirra vegna.
Gerðar eru kröfur um að úrbætur verði gerðar á starfsleyfistímanum og að á þeim tíma sé skylt að hafa við alla vaska skilti sem upplýsir kaupendur gistingar um að sjóða þurfi neysluvatnið, heilnæmi þess sé ekki tryggt.
