Slæmt ástand Berufjarðarvegar: dugir skammt að hefla
Svavar Pétur Eysteinsson tónlistarmaður og bóndi á Karlstöðum í Berufirði er orðinn langþreyttur á ástandi þjóvegar eitt fyrir botn fjarðarins.Í lok síðustu viku sprakk dekk í hjá Svavari Pétri í þriðja sinn á nokkrum dögum á malarkaflanum í Berufirði. Svavar segir að bæði bíllinn og dekkinn séu ný en þoli einfaldlega ekki þennan vegkafla. Hann segist hafa átt þann kost einan að leggja fólksbílnum og keyra harðgerðara farartæki á Djúpavog en leiðina þurfa þau hjónin að fara með börn til og frá leikskóla daglega.
Svavar segir ástandið á veginum hafa verið einstaklega slæmt, „Þetta er bara eins og að keyra á gaddavír en við þurfum að keyra þetta til að sækja þjónustu í okkar sveitarfélagi. Kostnaðurinn sem hlýst af ástandi vegarins er náttúrulega gríðarlegur fyrir okkur sem þurfum að fara þetta reglulega, bíllinn minn er til dæmis enn einu sinni á dekkjaverkstæði á Breiðdalsvík núna.”
Nú hefur vegurinn verið heflaður en Svavar segir það duga skammt „Vegurinn verður kominn í ólag aftur eftir nokkrar vikur.”
Svavar telur einfaldlega ótækt að klára ekki að leggja bundið slitlag á þjóðveg eitt. „Það eru 18 ár síðan vegurinn um Berufjörð var klæddur. Vegna ósættis um styttingu var vegurinn ekki kláraður í botni fjarðarins. Það er ekki hægt að bjóða upp á þetta stundinni lengur. Það þarf að leggja bundið slitlag á gamla veginn strax, samhliða því að reyna að ná lendingu um nýjan veg og það hefði átt að gera fyrir löngu.”