Rithöfundalestin 2020: Dauði skógar eftir Jónas Reyni Gunnarsson
Dauði skógar er þriðja skáldsaga Fellbæingsins Jónasar Reynis Gunnarssonar, sem með fyrri verkum hefur skipað sér í röð helstu ungskálda þjóðarinnar.„Þetta er fyrsta bókin mín sem gerist ekki í borg heldur er sögusviðið lítið þorp úti á landi. Hún fjallar um fjölskylduföður, smið sem er nýbúinn að selja fyrirtækið sitt,“ segir Jónas um bókina.
„Hann situr á töluverðum fjárhæðum en veit ekki hvað hann á að gera næst. Hans helsta ástríða er lítill skógur rétt fyrir utan þorpið sem hann og pabbi hans hafa ræktað en í miklum rigningum fellur aurskriða í hlíðinni þar sem skógurinn er og í ljóst koma sprengjur frá síðari heimsstyrjöldinni.
Þetta situr líf hans á hvolf á sama tíma og hann glímir við vandamál í fjölskyldunni. Hann upplifir að dauðinn sæki að honum úr öllum áttum en á sama tíma þráir hann, eða örvæntir um, að finna sér griðastað.“
Rithöfundalestin hefur verið árviss viðburður á Austurlandi þar sem landsþekktir rithöfundar, í bland við austfirska höfunda, hafa lesið upp úr nýútkomnum verkum sínum. Rithöfundalestin 2020 er samstarfsverkefni Gunnarsstofnunar á Skriðuklaustri, menningarmálanefndar Vopnafjarðarhrepps, Skaftfells menningarmiðstöðvar á Seyðisfirði, Menningarstofu Fjarðabyggðar, menningarmálanefndar Djúpavogs og Austurfréttar/Austurgluggans.
