Ríflega 30 milljóna tap hjá Vopnafjarðarhreppi
Ríflega 32 milljóna tap varð á rekstri Vopnafjarðarhrepps í fyrra. Skuldir sveitarfélagsins lækka lítillega milli ára.Síðari umræða um ársreikninginn var tekin á fundi sveitarstjórnar í gær.
Tekjur sveitarfélagsins voru tæpir 1,33 milljarður, þarf 890,4 milljónir í A-hluta, sem lýst er sem reglubundnum verkefnum sem fjármögnuð eru með skatttekjum. Í B-hluta eru verkefni fjármögnuð með sértekjum.
Gjöldin námu alls 1,25 milljörðum, þar af 956 milljónum í A-hluta. Útsvar og skattar voru um 65 milljónum hærri en áætlað var og aðrar tekjur 70 milljónum. Á móti eru laun 65 milljónum yfir áætlun í A-hluta og 90 í samstæðu. Annar rekstrarkostnaður er 40 milljónum yfir miðað við áætlun í A hluta en 20 í heildina.
Niðurstaða fyrir afskriftir og fjármagnsgjöld var neikvæð upp á 65,7 milljónir í A-hluta en jákvæð um tæpar 76 milljónir í heildina. Þegar afskriftir og fjármagnsliðir hafa verið teknir með er niðurstaðan tæplega 115 milljóna tap í A-hluta og 32,3 milljónir í heildina.
Í áætlun var reiknað með 86 milljóna tapi á A-hlutanum og 60 milljónir í heildina. Þetta er þó betri afkoma en í fyrra þegar 67 milljóna tap varð hjá samstæðunni, þar af um 197 milljónir í A-hluta.
Skuldir sveitarfélagsins eru 1,4 milljarðar í A-hluta og rúmir 1,9 milljarðar í samstæðu. Eignir eru þær sömu. Skuldahlutfall Vopnafjarðarhrepps er 78% í heildina en 110% hjá A-hluta. Í bókun hreppsnefndar frá í gær segir að skuldastaðan sé góð.
Veltufé frá rekstri er neikvætt um rúmar 54 milljónir í A-hluta en jákvætt um 47,5 milljónir í heildina. Stöðugildum og ársverkum fjölgar um níu milli ára en starfsmönnum um tvo og eru 91. Launakostnaður sveitarstjóra og sveitarstjórnar lækkar um 11 milljónir.
Fræðslu- og uppeldismál eru langstærsti gjaldaliðurinn, 461 milljón eða tæp 63% skatttekna. Í B-hluta kemur hafnarsjóðurinn áberandi best út, af honum er 73 milljóna hagnaður. Við fyrri umræðu um ársreikninginn var samþykkt að færa halla af rekstri hjúkrunarheimilisins Sundabúðar upp á 39,7 milljónir sem framlög til heilbrigðismála.
Í bókuninni frá í gær kemur fram að sveitarfélagið hafi þurft að greiða með rekstrinum þar sem framlög ríkisins hafi ekki dugað til undanfarin ár. Þar er einnig komið inn á áhrif Covid-faraldursins sem er ekki sagður hafa haft veruleg fjárhagsleg áhrif á sveitarfélagið en birst í breytingu á veitingu þjónustu, svo sem skólastarfi og auknum forföllum starfsfólks.
Í fyrstu útgáfu fréttarinnar sagði að skuldahlutfallið hefði verið 110%. Það er hlutfallið í A-hlutanum eingöngu.