Minna á nýjar reglur á miðnætti
Aðgerðastjórn almannavarna á Austurlandi minnir Austfirðinga á að hertar reglur vegna Covid-19 faraldursins taka gildi á miðnætti. Reglurnar ná yfir landið allt þótt staðan sé ágæt eystra í augnablikinu.Stærsta breytingin er sú að almennt mega ekki vera nema 20 manns samankomnir á sama tíma í einu. Á því eru hins vegar nokkrar undantekningar, sem nánar er getið um í tilkynningu heilbrigðisráðherra. Neyðarstigi almannavarna hefur verið lýst yfir og tekur gildi á sama tíma.
Samkvæmt frétt á heimasíðu Verkmenntaskóla Austurlands hefur verið ákveðið að fella nær alla kennslu niður á morgun, mánudag, á meðan skólastarfið verður skipulagt samkvæmt nýju reglunum.
Staðan á Austurlandi er þó ágæt í augnablikinu. Einn er í einangrun vegna virks smits og aðeins tveir í sóttkví.
Aðgerðastjórn minnir þó engu að síður á mikilvægi þess að fylgja reglum, gæta að fjarlægð, handþvotti og sprittnotkun. „Höldum áfram að gæta að okkur og göngum þennan veg saman sem fyrr.“
