Mikil gleði á Breiðdalsvík
Hákon Hansson, oddviti Breiðdalshrepps, segir mikla ánægju þar með úrslit sameiningarkosningar hreppsins og Fjarðabyggðar. Yfir 85% sögðu já í hvoru sveitarfélagi.„Við sátum hérna 20 manns og fylgdumst með talningunni og biðum svo eftir lokatölunum í Fjarðabyggð. Það ríkir mikil gleði hér,“ segir Hákon.
Hann segir tölurnar í Breiðdal, þar sem 85% samþykktu sameininguna, ekki endilega hafa komið á óvart, tilfinningin hafi verið sú að afgerandi meirihluti styddi sameininguna. Kjörsóknin, tæp 65%, hafi jafnvel verið meiri en búist var við.
Hann segir afgerandi niðurstöður í báðum sveitarfélögunum gott veganesti fyrir framhaldið. „Við vissum minna hvernig úrslitin yrðu í Fjarðabyggð, eftir kynningarfundina höfðum við þó tilfinningu um mikinn meirihluta með sameiningu.
Ég er ánægður með að þar skuli einnig hafa verið yfirgnæfandi meirihluti með. Það er gott og sterkt upp á framtíðina að úrslitin séu svona afgerandi.“
Sameiningin gengur í gegn eftir sveitarstjórnarkosningarnar í lok maí en kosið verður í sameinuðu sveitarfélagi sem heita mun Fjarðabyggð.
Hákon lýsir einnig mikilli ánægju með alla vinnu í kringum sameininguna. „Mér finnst framkvæmdin hafa tekist sérstaklega vel, samstarfið við sveitastjórnarráðuneytið tókst vel og það bar hvergi skugga á neitt í starfi sameiningarnefndarinnar.“
