Lítil skriða í Botnahlíð í gærkvöldi
Lítil aurspýja kom niður á milli tveggja rýmdra húsa við götuna Botnahlíð á Seyðisfirði um klukkan hálf tíu í gærkvöldi. Ástandið þar verður metið þegar birtir á ellefta tímanum.Samkvæmt upplýsingum frá lögreglu kom spýjan eftir lækjarfarvegi og hélst í honum að götunni þar sem hún gusaðist yfir hana. Ekkert tjón er enn sjáanlegt af hennar völdum.
Talsverð úrkoma er enn á Seyðisfirði eða 34 mm frá miðnætti. Bannað var að fara inn á svæðið sem rýmt var í fyrradag frá klukkan 16:30 í gær.
Staðan verður endurmetin þegar birtir, eða um klukkan hálf ellefu og er næstu tilkynningar að vænta um klukkutíma síðar. Íbúar geta nálgast upplýsingar hjá vettvangsstjórn aðgerða í húsi björgunarsveitarinnar Ísólfs frá klukkan átta.
Fjöldahjálparstöð Rauða krossins í Herðubreið er áfram opin. Þar er áfallahjálp í boði og í tilkynningu aðgerðastjórnar frá í gær eru íbúar sem telja sig hafa þörf fyrir hana hvattir til að nýta hana.
