Leggja 120 milljónir króna aukalega í loðnuleit
Hafrannsóknastofnun mun fá 120 milljón króna aukaframlag samkvæmt breytingartillögum fyrir 3. umræðu fjárlaga næsta árs til rannsókna og leitar að loðnu.Þetta kemur fram í tilkynningu frá sjávarútvega- og landbúnaðarráðuneytinu. Þar segir að Kristján Þór Júlíusson, sjávarútvegs- og landbúnaðarráðherra, hafi fundað í gær með fulltrúum stofnunarinnar og Samtaka fyrirtækja í sjávarútvegi um fyrirkomulag loðnuleitar á næstu vikum og mánuðum. Samstaða er um að leitin verði eins umfangsmikil og þörf er á enda miklir hagsmunir í húfi.
„Engar loðnuveiðar hafa verið stundaðar við Ísland síðustu tvær vertíðir með tilheyrandi tjóni. Eftir mælingar á ungloðnu haustið 2019 ríkti jákvæðni um að loðnuveiðar yrðu stundaðar á komandi vetri. Ráðlagður upphafskvóti var 170 þúsund tonn,“ segir í tilkynningunni.
„Í kjölfar mælinga tveggja rannsóknaskipa í september 2020 var ráðgjöfin endurskoðuð en þá lagði Hafrannsóknastofnun til að engar veiðar yrðu stundaðar nema mælingar á stærð stofnsins í janúar og febrúar 2021 gæfu tilefni til. Byggði sú ráðgjöf á gildandi aflareglu Íslands, Grænlands og Noregs. Í fyrradag tilkynnti Hafrannsóknastofnun um ráðgjöf um aflamark upp á 21.800 tonn.“
Ráðgert er að næsti loðnuleiðangur verði farinn í byrjun janúar.
