Keppast við að verja fjarskiptabúnað
Allt kapp er nú lagt á að verja fjarskiptabúnað sem geymdur er í gamla pósthúsinu á Seyðisfirði. Frárennsliskerfi bæjarins er fullt eftir rigningar síðustu daga.„Við erum að reyna að dæla í burtu vatni sem umlykur gamla pósthúsið til að verja fjarskiptabúnað sem þar er inni og varaafl fyrir hann,“ segir Haraldur Geir Eðvaldsson, slökkviliðsstjóri hjá Brunavörnum á Austurlandi.
Seyðisfjörður hefur í gegnum tíðina skipt miklu máli fyrir fjarskipti við umheiminn og þar kemur meðal annars einn angi Farice-sæstrengsins á land. Talsvert er því í húfi að verja fjarskiptamiðstöðvar bæjarins.
„Frárennsliskerfið er fullt en hefur undan núna. Áhersla okkar núna er á þetta. Við höfum ekki komist inn í neina kjallara til að skoða híbýli fólks.“
Skriðan sem féll í nótt umlykur einu bensínstöðina á Seyðisfirði og er hún óaðgengileg. „Það skapar okkur töluverð vandræði því dælurnar okkar ganga fyrir bensíni. Við fengum sendingu áðan frá áhaldahúsinu á Egilsstöðum þannig við erum góðir í töluverðan tíma. Samvinnan er góð og það hjálpast allir við að láta þetta ganga.“