Hættustig í gildi á Seyðisfirði
Ríkislögreglustjóri, í samráði við lögreglustjórann á Austurlandi og Veðurstofu Íslands, lýsti um miðnætti yfir hættustigi vegna skriðufalla á Seyðisfirði. Fleiri minni skriður féllu í gærkvöldi en beðið er eftir að sjá verksummerki þegar birtir.Hættustigi er lýst yfir ef heilsu og öryggi manna, umhverfis eða byggðar er ógnað af náttúru- eða mannavöldum, en ekki svo alvarlega að um neyðarásand sé að ræða.
Síðasta skriðan sem vitað er af féll um klukkan tíu í gærkvöldi en ekki er talið að hún hafi valdið miklum skemmdum.
Í frétt frá ofanflóðadeild Veðurstofunnar segir að í kjölfar stóru skriðanna tveggja hafi fallið fleiri skriður sem meðal annars hafi náð niður í garða við hús sem rýmd voru. Þá hafi gengið aur úr skriðusárinu í Botnum sem náð hafi inn í bæinn.
Tekin var ákvörðun um rýmingu um 50 húsa við fjórar götur bæjarins eftir að tvær skriður féllu inn í bæinn með um hálftíma millibili um klukkan þrjú í gær. Vegna þessa yfirgáfu um 120 manns heimili sín. Opnuð var fjöldahjálparmiðstöð í félagsheimilinu Herðubreið þar sem fólkið fékk kvöldmat en enginn gisti þar þó.
Björgunarsveitir og lögregla hafa í morgun fylgt fólki til síns heima til að sækja nauðsynjar og gera nauðsynlegar ráðstafanir.
Almannavarnir og Veðurstofan sitja nú á fundi til að taka stöðuna. Von er á tilkynningu um klukkan tíu með frekari upplýsingum.
Skriður hafa fallið víðar eystra eftir nær samfelldar rigningar undanfarna viku og er óvissustig almennt í gildi á Austfjörðum.
Mynd: Ómar Bogason
