Gul veðurviðvörun nær yfir allt Austurland
Gul veðurviðvörun Veðurstofunnar nær nú yfir allt austanvert landið í dag og fram á kvöld. Spáð er norðvestan stormi eða roki.Á Austurlandi að Glettingi er spáð norðvestan 18-23 m/s og lélegu skyggni í hríð á fjallvegum. Búast má við 30-35 m/s hviðum við fjöll. Samgöngutruflanir líklegar. Viðvörunin gildir til klukkan þrjú í dag.
Á Austfjörðum er einnig spáð norðvestan stormi eða roki, 18-25 m/s. Búast má við mjög hvössum og varhugaverðum vindhviðum við fjöll 35-45 m/s. Samgöngutruflanir líklegar og ekkert ferðaveður er á meðan viðvörunin er í gildi.
Nauðsynlegt er að tryggja lausamuni til að fyrirbyggja foktjón og er fólki bent á að sýna varkárni og fylgjast með veðurspám. Viðvörunin gildir til klukkan átta í kvöld.